بعد ما حاجة يذبح بينا الافغاني ... احنا اخوان واحد يذبح الثاني

بسم الله الرحمن الرحيم
اللهم صل على محمد وال محمد
هذي قصيدة تحجي عن الواقع المرير الي عشناه والي جاي نعيشه

للشاعر نائل المظفر

بعد ما حاجة يذبح بينا الافغاني
ولا عبوة بدرب يزرعلي جيراني
ولا يدخل يهودي ولا امريكاني
اخنا اخوان واحد يذبح الثاني
بير التفرقة حفرته الامريكان
وادري وما طحت بس هو جراني
خمس سنين يذبح وانا راسي بكيس
وبجنطة الجسد وبجنطة ذرعاني
جبت عمرك حكم بسك بعد شتريد
تظل ابن القصر وابن القصب اني
وتظل انت العجل وانا اليول للموت
واظل بلا اظافر وانت سجاني
وتظل البصرة عاجر وام ولد تكريت
وتظل تنكل حطب لديالى ميساني
وتظل وي العرب واخواني ذول تكول
ويسألونك علي وتكلهم ايراني
باوع على اخوانك بيه شيسوون
وشوف شلون اخوك يرجع احساني
يعوف اختي بعبوته مكشفى على الكاع
يتفرج عليها القاصي والداني
وانا لكل اعربية اتكشفت هديت
واغطيها بقميصي والبس الثاني
من هدوا عليك وطبوا لعمان
ما كلتلك اختك هذا غطاني
وانا لو ما شريف اليوم اطب ردود
وانزعهن واكلهن ذني قمصاني
عمر اعلف عليكم والشعب جوعان
ويولوموني واكلهم ذولا فرساني
تالي تهد علي وحصاني ميت جوع
والله اتندمت لو عالف حصاني
لمريكا شلع كلكم حنيتوا الراس
وعذرتوا ارواحكم واتعيرت اني
انا صح دنكت كدام الامريكان
ولكن دنكت شديت قيطاني
ولأن شيعي الحكم ادفع ضريبة تريد
وانا شحصلت والشيعي شنطاني
انكسر قلبه على كوخي وقال اهدمه اليوم
وابنيلك قصر وتسكنه بس تاني
بس تاني بس تاني واتاني واتاني
خمس سنين صار وانت طابوكة ما باني
حتى التاني ملت مني المتاناة
اذا اكللها تاني تكلي ما اتاني
بعد ما انتخب لا والله والعباس
لو كتبوا اسم بأيات قرأني
بيت الطين يرجف وهم عركانين
وصورهم لزكوها بطين حيطاني
وشعارات على بيتي يدكله طول قماش
وانا بعازة كماط يغطي رضعاني
رد لفندقك والجبته اخذه وياك
بعد ما اريد القصر ردني على بنياني

يسلمووو عساك على القوه

مشكور اخوي ابوجعفر